يستمر تهديد ارتفاع أسعار اللحوم في المحافظات، للمواطنين وخاصة مع اقتراب عيد الأضحى المبارك، والذي يشتري فيه المواطنين اللحوم. مما يسبب حالة من الاستياء لأهالي طنطا وسط دعوات لمقاطعة الجزارين.

وتفاجأ الأهالي وخاصة محدودي الدخل والفقراء، والذين يدخرون من قوت يومهم، استعدادا لشراء لحوم عيد الأضحى، من ارتفاع أسعارها لتصل الى 90 جنيها للكيلو؛ مما زاد استياءهم وحيرتهم، فيما طالب بعضهم بمقاطعة شراء اللحوم والجزارين لحين انخفاض الأسعار.

فيما اشتكي المواطنون من ارتفاع أسعار اللحوم؛ فقالت إسلام السعيد، ربة منزل: "أنا عندي 4 اطفال وجوزي شغال على باب الله باليومية كنت اللحمة دي بشتريها في الاعياد بس دلوقتى اما وصلت 90 جنيه مابقتش ادخلها البيت علشان العيال ينسوها هعمل ايه يعنى".

وأضاف محمد إبراهيم، موظف: "مش اللحمة بس اللي غالية، كل حاجة علينا بقيت مبالغ فيها يعنى مرتبي اطلع منه الاول مصروف دروس العيال والكهرباء والمياه مالاقيش يعدها حاجه باقية تأكلنا.. فبنمشي على أدنا... دا اللي في ايدينا وربنا يتولانا".

كما عبر شريف عبد العزيز، عامل، عن استيائه قائلاً: "هي جات على اللحمة اهه بجملة الحاجات اللي منعرفش عنها غير اسمها، الحكومة عايزانا نموت من الجوع.. اللحمة دي بتاعة الغنى انما احنا لو لقينا العيش والملح اهه راضيين".

وأضافت نبيلة محمد، موظفة: "انا شايفه ان مفيش سبب منطقي للزيادة في أسعار اللحوم يعنى لو سألتوا عن العلف هتلاقوا اسعاره كويسه انما كل دا بسبب غياب الرقابة من الحكومة والرشاوى اللي بتندفع"، متابعة: "دا لو احنا بناكل لحمه مطمئنين انها مفيهاش أمراض كمان"، كما ختمت حديثها بقولها: "احنا في معاناة والله وعلى الغنى والفقير، ما هو فيه حاجات اولى من حاجات يعنى ليه اشترى كيلو لحمه ب 90 جنيه وانا في احتياج ليهم لحاجه تانية اهم".
رصد