قالت الناشطة الحقوقية "سناء سيف عبدالفتاح" أنها عزمت على تسليم نفسها لسلطات الانقلاب بعد حكم ظالم جديد بحبسها بتهمة إهانة القضاء.

وقالت نجلة الحقوقي الراحل "أحمد سيف الاسلام عبدالفتاح" وشقيقة الناشط المعتقل "علاء أحمد سيف عبدالفتاح" قالت عبر حسابها الشخصي بموقع فيس بوك، نصا :

"طلع ضدي حكم غيابي بالحبس 6 شهور مع النفاذ في قضية اهانة موظف عام. انا في طريقي لقسم السيدة لتسليم نفسي.

من امبارح قررت ماروحش المحكمة، ولو صدر ضدي حكم مش هاعمل معارضة أو استئناف، وهاسلم نفسي للتنفيذ. هاحاول أشرحلكم ليه وصلت لكدة.

2011 الجيش قبض عليا في أحداث مجلس الوزراء، واحتجزت واتضربت في مبنى مجلس الشعب. بعد ما خرجت اتعرفت على صورة لظابط من اللي ضربوني وقدمت بلاغ بصورته، والقسم بعتني للمستشفى عملت تقرير طبي. وفضلت أمشي في الإجراءات دي حوالي سنة. ملف يتنقل من نيابة للتانية لحد ما راح لقاضي التحقيق. فيديوهات مراقبة بعد ما شفتها في مكتب في وزارة العدل تختفي. في النص التقرير الطبي يضيع فندور عليه في الأرشيف، بعدها ب 10 شهور يطلبوا كشف عليا تاني، لحد ما الملف اتركن وأنا زهقت. بعدها بـ 3 سنين في نفس الواقعة، ألاقي المتظاهرين هم اللي بيتحكم عليهم بتأبيدات!

2014 شاركت في تنظيم مظاهرة ضد قانون التظاهر واتقبض عليا. اعترفت للنيابة بتنظيمها لإني مقتنعة ان التعبير السلمي عن الرأي حق دستوري. في الآخر تهمة التنظيم اتشالت واتحكم عليا أنا و22 غيري بالسجن على تهم تانية ملفقة (أكياس مولوتوف، تخريب ممتلكات ..) مع إني معترفة بالحقيقة.

في كل اللي فات كنت باتعامل مع "منظومة العدالة" بجدية، وفي المقابل ألاقي وكيل نيابة بيقول لي "أنا مش عايز احبسك بس مش بايديا"، وقاضي بيسأل "فين الحبس الاحتياطي ده؟" وأنا محبوسة قدامه قبل الحكم.

بعد ما جربت اتعامل معاهم مرة كصاحبة حق ومرة كمتهمة، دلوقتي مطلوب مني تاني العب دور المتهمة. ومطلوب من المحامين يستهلكوا طاقتهم في الدفاع عني. أنا المرة دي مش لاعبة، لأني ببساطة مابقاش عندي طاقة اتعامل مع إجراءاتهم. دي مش فتحة صدر، الحبس مش سهل وأنا عارفة. ودخوله تاني أكيد هيبقى أصعب بعد ما رجعت أشوف أخويا وعوضت فترة غيابي وشديت كويس في شغلي. لكن طالما هم مصرين يورطوني وكدة كدة هادفع التمن، أدفعه وأنا شَبَه نفسي.

المحامين .. زملاء وتلامذة وأصدقاء بابا. أنا آسفة اني المرة دي باطلب منكم ما تقوموش بدوركم؛ الدور اللي باحترمه جدا.
أنا اتربيت في بيت محامي حقوقي وشُفت ازاي بتتعاملوا مع شغلكم بتفاني وجدية. ولأني باحترم دوركم، وباحترم القانون، فضلت - على الأقل لمرة - إني أعفيكم وأعفي القانون من الإساءة دي".

طالع أيضا : قضاء الانقلاب يقضي بحبس "سناء سيف" 6 أشهر بتهمة إهانة القضاء في أول جلسات المحاكمة