كتبت "سارة" شقيقة المعتقل المضرب عن الطعام محمد صلاح الدين سلطان عبر صفحتها الشخصية بموقع التواصل الاجتماعي "فيسبوك" بيانًا للعائلة توضح فيه حالة شقيقها الصحية بعد زيارته بمستشفى المنيل التخصصي، قالت فيه:
انهاردة العيلة عرفت تشوف محمد في المنيل التخصصي، ودخلنا بعد مشادات مع أمن المستشفى اللي كانوا منعنا من الدخول للمستشفى أصلا -مع إننا معانا تصريح زيارة من السجن-، وبعد مشادات ومشاحنات حصلت عرفنا مع حد من الأمن نطلع نكلم الضابط المسؤول عن محمد وقدرنا أن احنا ندخله - بعد عناء -".
واكتشفنا بعدها الآتي:
1- دخلنا لقينا محمد ايده متكلبشة في السرير والكلبش ضيق على ايده!
والضباط قالولنا انهم امبارح لقوا طبيبة امتياز بتشحن تليفونها جنب محمد وكان فيه تفتيش دخلوا عليه لقوه بيتكلم في التليفون ده، رغم أن محمد اما حكالنا قال انه كان نايم وصحي على الدوشة!
مع العلم إن محمد مبيعرفش يتقلب على السرير من الأساس إلا بمساعدة الأطباء!
2- من المفترض ان محمد يتنقله وحدات دم لكنه امتنع عن ده عشان موضوع الكلبش اللي في السرير.
3- كان اتفاق محمد مع الأطباء ساعة دخوله المستشفى انه هياخد محاليل ملح بس. انهارده وهو نايم صحي اكتشف ان الأطباء حطوله محاليل تغذية، قرر ساعتها انه هيمتنع عن كل المحاليل عشان فقد ثقته في فريق الأطباء (لأن التقارير بتاعة المستشفى هتبقى مرفقة معاه يوم السبت الجلسة واللي هي أكيد بعد تعليق محاليل التغذية هنثبت إن صحته مستقرة ومش على هذا القدر من الخطورة وإنه مش هيحتاج إفراج صحي من القاضي)
لما محمد فكر الأطباء بالاتفاق انه هياخد بس محلول ملح قالوا له (لو مت عندنا هنكتبك منتحر)!"
وتابعت قائلة "العيلة بتحمل المسؤولية الكاملة للداخلية والسفارة الأمريكية المتواطئة بتباطؤها عن حياة محمد سلطان خصيصا بعد تعرض محمد للإهانة بكلبشته في سرير المستشفى اللي على إثرها قرر انه يمتنع عن أي رعاية طبية من الأساس!".
