هذا ما كتبته أخت المعتقل "أحمد الخطيب" الذي يعاني من مرض خطير ، وطالب العديد من المنظمات الحقوقية ومن بينها مركز الشهاب نقله للعلاج لتدهور حالته :

"النهاردة طلع قرار بنقل أحمد من مستشفي حمايات العباسية للسجن تاني كل المؤشرات بتقول إنهم بيدور إزي يقتلوا أحمد بالإهمال الطبي .

الخبر بالنسبة لينا كان صدمة متخيلين !!!!
أحنا كلمنا ناس هناك عشان يفهموا في ايه قالولنا أن " إبنكم أتعالج خلاص وكان بيتدلع دا كله "

نسأل نقول أحمد ليه حيتنقل يقالوا أتعالج طب فين التقارير اللي بتثبت علاجة احنا والله هنفرح لو طلع فعلا اتعالج ومش عايزين اكتر من كدا فياريت تعرفونا يقولوا مافيش تقارير طب ليه مافيش تقارير طالما أتعالج زي ما بتقولوا مافيش إجابة ولا فيه رد طب الطحال ووزنه والكبد اللي اتدمروا من المرض اتعالجوا اه طب فين التقارير مافيش طب المرض اتعالج ف شهر واحد او أقل اه طب فين التقارير مافيش تقارير يبقي عايزين تموتوا أحمد زي كريم ومهند .

طب عليماً أحمد ما ينفعش يرجع السجن تاني خاصة وادي النطرون لأن ده اللي جالوا فيه المرض وسهل يرجع تاني له ده لو إفترضنا إنه أتعالج يعني لأن جسم أحمد المرض كان أتمكن منه خلاص ودمر المناعة والطحال

الداخلية نزلت بيان تهدي الناس بيه ومنفزتش اللي قالتوا إنها معندهاش مشكلة تنقل أحمد مستشفي خاصة بس العائلة تقدم طلب ورغم إننا مشينا ف كل الطرق وكل الحلول علشان أحمد بس يتعالج وموصلناش لحل ولا نعرف أحمد أتعالج ولا لا ولا نعرف ليه الداخلية رفضه هي والمستشفي تدينا تقارير طالما أتعالج بس كل اللي نعرفه وعن خطوات حصلت وحالات تشبه حالة احمد وماتوا زي كريم مدحت ومهند اللي اتقتلوا بالعمد بالإهمال الطبي .

بمعني مافيش تقارير وحينقلوا أحمد السجن رغم إن خطر ده يحصل يبقي كل المؤشرات بتقول إن حالة مهند وكريم ممكن تتكرر تاني بسبب إهمال الداخلية وإستهتارها بحياة البني آدمين كدا .

ليه مصممين علي قتله زي مهند وكريم .. ودي صورة أحمد ف المستشفى متخيلين حيرجع السجن وهو بالشكل ده حيرجع ينام ع الارض ووسط المساجين و مناعته مدمره وصحته بالشكل ده طب إحنا عايزين أحمد يعيش يعيش بس مش عايزين نتحسر عليه زي اللي راحوا وماتوا بالإهمال الطبي تضامنوا مع حق أحمد الدستوري بلاش الإنساني طالما حقوق الإنسان هنا بتزعلهم."

ومركز الشهاب لحقوق الإنسان يحمل مسئولية سلامة المعتقل لوزارة الداخلية ومصلحة السجون ويطالب بحق المعتقل القانوني في العلاج المناسب ، والمعاملة الإنسانية